Ef þú æfir á þokkalegri líkamsræktarstöð hefur þú alveg örugglega séð hvíta eða svarta rúllu liggjandi á teygjusvæðinu og pælt í því hver andskotinn þetta er. Næst þegar þú ferð í ræktina ætlar þú að taka þessa rúllu og nota hana, því allir, já ALLIR hafa gott af því að nota rúlluna.

Hvað gerir þessi rúlla?

Golgi tendon organ(GTO) er líffæri sem er staðsett á mörkum vöðva og sinar.   Það er mjög næmt fyrir breytingum á spennu í vöðvanum og hversu hratt hún myndast.  Vöðvinn slakar á þegar GTO er örvað sem varnar því að hann verði fyrir of mikilli spennu til að varna gegn meiðslum.  Ef GTO er örvað í langan tíma getur það haft hamlandi áhrif á vöðvaspóluna í sama vöðva.  Þetta kallast sjálfvirk hömlun og gerist þegar tauganemi sem nemur viðbragð skynjar meiri spennu en viðbragð sem skapar vöðvasamdrátt.  Þá hefur vöðvinn hamlandi áhrif á sjálfan sig.

Rúllunin er aðferð sem leggur áherslu á tauga- og bandvefskerfið.  Við æfingar og annað álag geta myndast hnútar og aumir punktar í vöðvunum.  Þegar þessi svæði eru nudduð raðast hnútarnir í línu við vöðvaþræðina.  Þrýstingurinn á vöðvann örvar GTO sem skapar sjálfvirka hömlun og minnkar virkni í vöðvaspólunum og ofvirkni í vöðvanum.  Þessi aðferð endursetur skynnema í bandvefnum og hjálpar líkamanum að ná ákjósanlegri virkni.

Fyrir þá sem skildu lítið sem ekkert í þessari rumsu þá er rúllunin eiginlega bara nudd fyrir fátæka manninn, hún losar um hnúta í vöðvunum og lætur vöðvann slaka á.

Hvenær og hversu oft á að nota rúlluna?

Eins og með svo margt annað þarf að halda við þetta í smá tíma til að finna áhrifin af þessu. Gefðu þessu 2-3 vikur amk 2-3 sinnum í viku og ég get lofað að þér á eftir að líða betur í líkamanum. Þetta á líklegast eftir að vera mjög óþægilegt og jafnvel sársaukafullt í nokkurn tíma en venst samt óvenju fljótt ef maður er duglegur. Hvenær þú rúllar skiptir ekki svo miklu máli, en mér finnst best að rúlla fyrir æfingar, þetta er fín upphitun, eykur liðleika og blóðflæði til vöðva.

Hvernig notar maður rúlluna?

Þetta er ekki flókið, þú rúllar á þér vöðvann fram og til baka sirka 10 sinnum. Gott er að finna sérstaklega auman stað og einbeita sér að því að rúlla þann stað vel. Eftirfarandi er myndbandasería af helstu vöðvunum sem ég rúlla. Einnig er þarna rúllun með tennisbolta en það er líka hægt að nota harðari bolta og harðari rúllu, ég sjálfur nota til dæmis grjótharða PVC pípu á flesta vöðvana.

Rúllun á il með tennisbolta

Rúllun á kálfa

Rúllun á aftanverðu læri

Rúllun á utanverðu læri

Rúllun á aftanverðu læri

Rúllun á innanverðu læri

Rúllun á rassi

Rúllun á rassi með tennisbolta

Rúllun á latissimus dorsi

Rúllun á brjóstbaki

Að lokum segi ég bara eins og Fred Durst og félagar í Limp Bizkit sungu um árið:

Keep rollin’ rollin’ rollin’ rollin’……